Paul Éluard
|
Paul Éluard (Isem nnes amezwaru, Eugene Grindel) (1895 - 1952)
Amedyaz afransawiy. Illul Paul Éluard g Saint-Denis gh useggwas 1895. Timsarin n imenghi amadêlan amezwaru flent gis adriz mqquren, mkkan af yeg yan umeghnas n ufra, yara yat tedla n umarg issagh as Timedyazin f ufra g useggwas n 1918. Asegwwas n 1920 ag inmaggar Tzara, Breton d Aragon lli ganin kra n inemghuren n umarg afransawiy yawes g umussu n Dada urta iffagh s yan umuddu ighezzifen llit yiwin ar kigan d tmizar n ddunit. Llig d yurri g umuddu yad, ikcem s trabbut n isuryaliyen. Mqqar yiwes kigan g usniffel n trabbut, ighama idêfr amnad nnes izêlin f tsekla d umarg. Anmuqqar nnes d Maria Benz, lli yiwel teg Nush Éluard, yessenghel tudert nnes. Yara f tmettût ad krât tadliwin n umarg: Igherm mqquren n ungâz (1926), Tayri, Amarg (1929), Tidet n dghya (1932).
Ttâyent g ukabar akuminisiy g useggwas n 1933 llig izzî d Aragon. Iffegh isker yan wanaw n umarg llis ira ad tt imdî ku yan mqqar ittkar s tewlafin d iwaliwen mmutlnin (Allen swanin, 1936). Dart uya, ikcem i uzbu idêfr sul asnulfu (Tarnnawt n Guemica, 1938, Amarg d tidet, 1942, tadla yad taneggarut ag tella tmedyazt Tilelli). Dart asddarfu n Fransa d tmettant n Nusch (1946), issfugh d sul kigan d tadliwin llig immal asirem nnes mqquren g tlalit n yat tallest illilen g udem nnes n idamen d uqjar. Ur jjun intel is ifels s wasa idran n ufgan, immut gh useggwas n 1952 gh Charenton-Le-Pont ifel d darât nnes yat taysi igguten gh d tagga tayri nnes idran i ilan d tghawsiwin d ufsaw ighezzifen lli ifka i tayri. Irrur tid s tmazight, Afulay |
|
