Timatarin — ⵜⵉⵎⴰⵜⴰⵔⵉⵏ
al-Hussein JOUHADÎ
dîwân shi’r amâzîghî. Casablanca, 1997
dîwân shi’r amâzîghî. Casablanca, 1997
|
Timatarin ad yegan ismel n tadla n umarg tamezwarut n Ljuhadi Lhusayn Abaàmran. Ar temmal mas d Ljuhadi ur igi ghas amessan n usghan (tirra n tmeddurt n nnbi Muhênd, tarurt n wammaken n leqran, tarurt n wawal n nnbi), yega awd amedyaz, yirir timatarin n tudert zun d tawtemt d ufulki, turrugza, tammara, taraàit d zzlêd. Mkan af takka tadla yad yan izêri f timsarin lli issenghlen iman nnes - zun d tid izdin d tsertit (imenghi n Amghala, tawada tazegzawt, d ughzu n imeghnasen n tmesmunt Tilelli g Igwelmimen), d tudert nnes (Tmettant n umeddakwel nnes Rahmani, laksîda…), zegh aseggwas n 1975 ar aseggwas llid teffugh tadla yad 1997- d yan udem f Merrok amaynu mekli t ittannay nettan (Timukrisin n tsertit, izerfan ufgan, aseqsi n wawal amazigh, d tmmara usin mdden).
Tsat s tzzizwart yara Muhêmmad Cafiq, sul yega ameltagh gh Takadimit n Tgeldit n Merrok, urta illa Usinag Ageldan n Tussna tamazight. Gh tsega yâden, ar temmal tadla yad tafasa yegguten llin yega umara nnes af ad yaf tiguriwin, isiggel tent, yarem tanana nnesent gh tiyyet llita ur kkant, izzizg awal nnes. Mkan nit af issdêfr I kra yegat tamedyazt yat tmawalt mezzîyen ad afin willi yeran as t ighêr ammak n tguriwin timaynutin llid yiwi.
Iggi n maya, ar d tsaggwa timatarin n yan warram yâden gh iger n umarg amazigh amaynu. Mkan af awen nghêra ad gis tghêrm imik, tzêrm mad inna ttâlb. (AL/AF) |
|
Juhadi Lêhusayn Abaàmran
Afulay
Ktuber 2003
Ktuber 2003
|
Ilul mas Juhadi Lêhusayn Abaàmran gh Tgemmi tumlilt gh useggwas n 1942. Ikkaten yega asalmad n umezruy ar aseggwas ad izrin. Yega seg Ayt Baàmran gh iffus n Merrok. Mad yad ihêsa leqran gh tmezgadiwin d lmedars gh Sus s tuggt n tghûriwin nnes, ikcem asselmd azayz ayelligh yumêz turagt gh umezruy. Ittussan mas yeg amessigel ur irmmin gh umezruy n Merrok, slawent akw win tasga n Sus, yara kigan d imagrad i Ma’lamat al-Maghrib; mekli dagh yega amedyaz s wawal amazigh, issufgh d tadla n umarg "Timatarin" gh useggwas n 1997 (dar Qurtuba, Tigemmi tumlilt).
Mac mas bahra ittussan tegat twisi nnes gh iger n usghan ittyaran s tmazight. Mad yad izzri kigan d isuyas n usghan gh radyu n Tshelhit lligh isawel f kigan d tghawsiwin izdin d iger ad, yara "Tagharast n ureqqas n Rebbi" llid iffaghen gh tizrigin n Agraw Lmeghrib x Isiggel d Isnifilen n Tawesna gh useggwas n 1995, ur ta ikcem i tarurt n leqran lligh iswurri uggar n mraw iseggwasen, tarurt ad llid iffughen ddaw isem n "Tarurt n wammaken n Leqran" gh useggaws ad nit, 2003. Uggar n uya, Juhadi Lêhusayn ittussan zwar mas yeg yan gh imeghnasen mqqurnin n Umussu adelsan amazigh. |
|
|
Tamazight ar tsawal
Nekkin a yegan tamazight is yi tannim Nekkin ayegan akafu ar ka sufux nsul Nekki tarbit lli ju ur telkemt ay afus Lsigh tizrar lsigh tasmert ar nttirir Negan isni tageldit as akw nttussan Amur inew agh ttidugh ur en akw netam Zegh Siwa ar Tiniggi ar keyyi a Ssinighal Nettan ad igan ljent gh ufella wakal A yenna trit illa gis max a t nsental Neghli d udrar neswa gis tamment ula aman Ngguz s uzaghar azzelgh ghikan wayyis Nkcem s ugrawal ddemgh zund ukan aslem Nayel s igenna ssufugh zund ukan ayyur Ghikan ad gigh gh mad izrin ula ghass ad Lligh gh uccbar nebidd amur iw af nekkat Nettây irumiyen mzigh Qertâj ar akal Nnerigh Windal nettây aàraben s ukuray Wannad yuckan inebgi ittêfar agh irim nnes Mac igh izri awettu han fellas akuray |
Afulki
Igh illa ufulki gh tergwa lghenbaz ur ntlen Igh illa gh rregw azenkwêd as nnan iwit Igh illa gh wawal amarg aghn akw imun Igh illa gh tît udad yuf kullu tiwallin Igh illa gh igenna han ayyur igh ilul Igh illa gh wakal ijjigen aghen akw imun Igh illa gh udem tazûlt a yyit immalan Ig as udlal ifrig idêlan slin akal Igh illa gh umgrêd izîlen ili tiwallin Han tannirt ayenna dagh tufit awi tent Mac afulki han ur gin yan ssen fellas Igat urgaz igh ibidd yasoi taqammut Ar ikkat f wamur ad nnes ar ass an immut Ifelt i warraw idusen idûf ar ikkat Afulikin wannat igweran ur sar as iqqur Nettan a yelan atig yuf kullu tayafut. |
|
Turrugza
Turrugza ti urgaz igh tent usin Ur sar ittâs u sar intil inna gh llan Turrugza tga bezziz yan mu tella gh ufus Iqqan d as tawi ayada nnes negh aqellal Turrugza ur a tilli s ugmar negh ikerwan Wanna mu tellan gh idammen ur at issental Tamatart n trrugza ur ntilent i yan Igh munent d lbarud d wayda yili wawal Tili tagwemat yili gh usgawer mak issen Ass nna tsawelt ighwêzan a kullu ttinin Igh illa umeqqun ad ur tawent i wawal Ar digh isawel ma ggisen illan awal nnes Ar digh ihric tzzuzert ghayelli s nnan Awal iga turrugza igh ifren ar lkkmen Turrugza tga zund lhint imik a terwas Tezwar uka uzzal takwi gh ujarif Nettat as d usigh uzzal ammas n takat Nettat a yenwan d igilem ayelligh iqqur Turrugza tla atig izzâyen a yan ur issen Igh ur tzêdi yan ur rzîn yakwiten wattân Negh iga attân ibidd ar yattâ mas ittut Han ur imdî turrugza ur ratent lkmen Turrugza tla id bab nnes kuyan imik nnes Illa ma tengha f iggi n wayyis ar ikkat Illa ma yudên iggawer awal as ikkat Admesir hatin imdî kwen ay attân immut Tedda gis turugza d usghar nnek ay awal Taguri tga zund lhint nettat as ikkat Gigan a yebidd gh tuzzûmt negh ar issillif Ar immal i wiyyâd ar ten sul issannun Ackun izêran gh taggugt ayellin ur netam Izêra n angi ikcemd anwal ula arraw nnegh Ar agh islilli s ljir ighal is rwan Ademsir ghass an ibrrêh awal nnes nnan "icca wuccen i wagerzamen tifeyyi gh ufus uka ar ittemnad ur as akw inna yat a butuzlin im rebbi ak raren fellatengh han ur gigi tadût maf mmaqarent ?" ademsir han ibidd ar yattâ tufawin umêzen accbar ur jju kwenin a t inna yan amezruy yura mad isker mas ittussan Isawel f uggren gint ammas n tillas isawel f tmezgida fkin as akuray isawel f wawal ad inew akweren inna nnan iga taghuyyit s messi skkufren awal nnes albensir uggug ad ifel ur sar iqqur ifeld izlan nnes ngin ka ar sswan arraw ifeld ayt imurig icwan ula rrîh nnes wanan d iflen ghwid isul ur akw immut amin a ten irhêm rebbi inat as amin |
Amghar
A wad ikwesan ulli gh udghar n tuccanin Ass nnz tgunt hanuccen a tent iwalan Amghar af tinn nega d a yedûf ar agh immal Sul igdel kem a tamazirt ig asafar nnes Amghar ur d ajllabiy negh axasiy as usin As usin d ayt tmazirt iriten kuyan |
Anefcad n Rrâhmani àbdullah al-Jactimi
Is ay aytmatengh tûdenem kullu ghilli udêngh Udêngh ixef udêngh adif gh ixs udêngh ul Ur jjun telli tad isker messi ur asent Isker ixef keyyin ad tahêlt nekki nnigh Ar talla tmazight idammen ar allan ussan Ar yalla wul inu yaddum lâh as aytmas Idda yas wallid iggawer wallis isawal Wallid gisen yaguren ghass a lâh iyyit Idda àabd llid drugh tilila ifel agh Ukan neggru d i wadân sul ar as allagh Ar allan ayt tmazirt ula sul ussan Mekli talla tad ixwelan f warraw nnes Tît ur tengi tasa nu ukan a yallan Manik ur allagh mdêlgh tin ukan nfelt Nekkatin innagh neggawer yat inu yat nnes D ufulki d uzaha d wassas iman Imil a gwema ghass ad izêra uggug aman Adû yiwi tagelzimt lâh agh asafar Is d kullu ghikad iqqan d a yan issulten A kullu tgim inagan taram inna nnigh Ula sul kra ittidun f ufella wakal Is ur nezdâr nekki ad neggru i tsmdêlt nnes Ur lligh a messi dark illigh a ttarat Azemz inew a yi giddin d imedukkal inew Igh nsmed ghid neddu dars ar ak nttirir Zud igdâd zud ajjig n flulu gh inummar Tamunt agh tella tudert dûfen k aytmak Ass nna bdânt tiddukla tenfassay akw Ur jju tengi tergwa s temqit n waman Igda yagh gh umettâ d usmammay nekki nnigh Wannad igweran ibidd gh uccbar n wanna lâh Neg afus gh ufus ndûf nasi asatur Nasi tabrat nara tent s lqelm n wanas Ssmêh a yeg uzzal ar digh tlkemt tasutin Imma han turrugza ddant icca tent wakal Tezzâ wass ayyur tezzâ ttyara tters ukan Nettat agh immut had adghar nnes ar allan Ikkatin gan amazzal kuyan issen sers Tudert nbêdat igh idda lxir ur aten ttugh Ad ak nghêr a messi ad as trhêmt iman nnes Yan igan inebgi dark ur ksûden yat Ssefld at kullu a mad ismun messi ghass ad Is nsamêh i àabd irigh gis netta tayâd. |
