URTI N TMATARIN (2)

Man awal s nezdâr ad is nara tamazight, d man isekkilen (iran, negh igemmayen), d man tagharast as nezdâr ad nezzû yat tsekla yâden, tasekla tamaynut igh ufigh ad inigh taguri ya, taguri, igh akw ur tegi tamaynut gh iger n usnulfu amazigh, tegat gh uzêtta n wawal acku ur ten tekki tguri ya gh umawal amazigh ? Iseqsiten ad, mqqar uglen s tmukrisin n wass ad, ugmen gh tugget n tmatarin izdân tinaniwin nnesent gh tmektit, d ayelli mu nezdâr ad nessagh asayrur amazigh negh ghas iger amazigh.

Iseqsiten ad, mqqar akw ur gin imezda f iger amzigh, acku ntteni af akw ittuzêda tigariwin ad, ilin fellasen izûran imnaden igliten nfaw negh ur nefaw, nera ad nales i tiseggwar nnesen lligh isen nera mnad yâden ur inmalan d ulman llif ttyasayn.

Zegh mad ikcem useqsi n tmazight iger asertan mad yad ittuyaskar uwanek anamur lli iruren timatarin mqqurnin nnes ; zun d awal, tagherma, tawassna, s iger yegan ar unsîb, negh ayelli mu ttinin urur f tsega (tamawant s tguri yâden). Tegli tenin tsertit, d izêri immghin gh tmatarin nnes, gh izâttiwen ittawin s ufûd, negh s gar ili, ili mmalen idûdan ad ittugdal negh ghas ad ittyanaf. Dat uyan, iffagh d, ger imuttiten imettidelsanen n tametti tamerrukit ; ghid ar sawalgh ghas f Merrok ur righ ad zzrigh anezgum ad inu i idgharen yâden gh llan imazighen acku nnzarayen igran meqqar ssaren yat tmukrist, yan umussu, issaghen i ixef nnes adelsan, ar ittini s tussna s izerfan n tmazight kra gan zegh win wawal, win idels ar, gh tgariwin ad, win wakal. Amussu ya, ur izdin yat d wawank, acku ilula berra nnes, yiwi tamazight s ayelli mu zdârgh ad inigh : iger amsuter ; zigh d yat tghawsa illan ger izâttiwen n usiwel n usuter. Immagh, ugar n kra yâden, ad imel tirêziwin n tmagit n wamur igh gis ur ittuyassan uggug amazigh. Amqqen n Agadir, f sresent gh useggwas n 1991, sdîs tmesmunin azwul nnesent, yuma kigan gh isewingimen ad, sul iqqen f isuturen mqqurnin lli yegan tagrat n tamaght n umussu adelsan amazigh. Maca, anaw ad n twuri igweli dagh aswingem gh iger amazigh fad ittu, negh ghas ad issanef, iseqsiten yâden izdin d iger ad, izdin d tmatarin nnes n idels, n tmektit d kigan yâden. Acku lligh isers tamasayt n tudert n tmazight f umggrêd n Wawank d imassen nnes, ur sul izêri gh ddaw imula n ifassen nnes imik n umras magh issenfruruy timatarin ad.

Ghemkan af nera, gh tefrawin ad mmezrinin, ur igweli kra n wanaw n ummater idêrsen, ad neswangem kigan d tmatarin izdin d tira gh iger amazigh, zegh uzû nnesent amenzuy ar innzarayen imaynuten f ustay n usekkil d unezgum n usmun n wawal…

Ar asenmili yâden

Afulay