|
G yat temdyazt ittuyassanen n Dda Ali Azayku, talli g isnal azûr yattuyen n waman g udrar d win tmagit n ufgan g wawal ad ur yeg azenzûm zzemzîyent willi f d ilul, ag d nesti yat tguri niri ad teg tamatart mqquren, ig ur nnigh amesikni ifawen, n tghmert ad llis righ,niri yakw ig nemyawas, ad teg asarag g sit ad, ad gis nettara, nssenfek imnaden, negh gis nzî s tmazight, s wawal amazigh d kra yuma n igariwen. Taguri yad, negh agezzum n temdyazt ar ttini :
Ur d is akw isman tallalin n tmagit g wawal, acku llant tiyyâd, igutent, yissan issent Dda Ali, ur yad yeg amassan n umezruy ! Maca d is isman tagûdi n tmagit g tudert n wawal. Amud nnes g tyerza n wawal d tserfin nnes. G yan uzemz g tenyakcamen iwetta n tmatarin, ar ttukafen negh ten zgren idâren n wiyyâd zrin ar tighula n iman, ur imezzîy waggwa lli rad yasi yan iran ad irar f ixef nnes, ig akw yadli ittu awal, rad tt ttun iwaliwen n wiyyâd idder ddaw tirazarin nnesen, ig gar negh yeg wayyâd, ayelli mu ttinin ifelsafen n umezruy : ufûd n umadan negh tamettant nnes tanemzruyt. Mkan af yeg wawal inek izgan g uzemzêlay n tmagitin. G Iseggwasen ad gguranin, ur d anaw n tudert, negh insayen n umadan a rad t izzemêli, ig as isem ger wiyyâd, mac awal nnes. Ur akw mmaghen iwanken ad sfêden iwaliwen ggutnin, zzûn yan ad ifek aklu i tamurt lli ran ad tt skun, zun d ig yeg tawtelt n tenamurt ad zwar tegt krayâden lli ur tegit. Mac awal yâden ayad ! Ad ghas aghulgh ar imi n usarag llig lligh ; righ ad inigh mas yeg usgudi s tmazight yan g izmuzzâl zganin, d wid iqqan ad nawi, ig nera ad neg isem i tmagit nnegh ger tiyyâd ; ad ur nales i warramen sergnin g umezruy. Llig nenna, g sit ad, mas nera ad as nssels timelsa yâden ig nssugt tayafut s tmazight, ur d is ka nesawel, maca d is neffagh s usarag a ; d is nera ad nasi taguri teg anezgum izwaren, wad idran d wad sar ur ismaren " llig ughalen waman s ighbula ". Tighmert ad mu ssagh " urti n tmatarin ", acku nesghawsa kraygat tizi, s igran, mqqar gan win twargit negh win ukccâd, magh nkkerz timatarin, magh nettasey " kigan ur nkkerz ", righ tt ad teg yan udghar magh nttarem iwulla negh ad ur rkmen gh ifessi n tama, d imula n tghemrin illasen. Ar asnmili yâden Afulay Amawal Urti n tmatarin : jardin des signes |