TADDÂNGIWIN

Taghwmrt-ad nra-tt ad gis yagwm kuyan kra n tguriwin lli s rad ikks irifi n rrmuyt zegh ustara (surf). Nra gis ad ur teg aghar taqqurt n idûdân gh lurdinatur, assufs gh uhêbu, icuccufen n yan yiwi ufraw uten-tt sres taddângiwin. Nra ad gis nmmaggar d man ur ntam gh mad zziwizent tirra yugin ad ttyarant.
Tamazight igh as nra tudert, ur-d iqqan ad ka fllas nsawwal, ad fllas nttara s iwaliwen n wiyyâd ? Tamazight zund kra igan ajddig yaggugn i usaru ira mad t-isswan, mad t-itnqqacn, mad t-isusin, mad t-itmataren... Ur-d iqqan ad t-nttalgh, ar nttalgh afulki-ns, amzruy-ns...nfel-t i irafan, ijawan d ifassen. Iqqan-d ad t-ndûf, nsusi-t, nagwm-as-d, ncc fllas takrrayt af ad ad akw yaf ingwa-ns yâz i willi fllas idusen.
Taddângiwin tga tadwayrit, ar tsbrrak s kra igan yan, kra igan yat, tasarut-ns tâdfi n wawal amazigh. Ran gis ttafam amarg, tallast, umiy, awal iddern, tamyurt, urarn...
Taddângiwin, as-t nsku (nbnu), [s tiwisi n kuyan] imik s imik s igidar d isutar n tghwrma-ngh, idûdân-ngh d winnun, iswingimn-ngh d winnun.
Brrek-at dar-ngh, nbrrek gh darun. Cucfat agh nasi gh yil ngh kigan ur-n ntam.
Ara yat agh-d s tansa yad : taddangiwin [at] mondeberbere.com
Astara ifulkin !
Lasri Brahim Amazigh