AHÂNU N TDAWSA
Uckand igllinn ammas n yan gh idûran n iffus n Lmghrib ur infàan, ur igaddan, ur yakkan tayyafut… ! krfsên, ur ccin, ur lsin, ur swin, ur hgrin, ula ttukfa yasnt tighawsiwin n tudrt lli s rad gin midden ur d imudar…Ar yat tardast n wakal lli ttâfn, tra tawunkt ad as nett tkkis, imma kra n turtitin nsn hati yukid srsnt ilf, iskr gisnt isksatn…
 |
|
Ali Chraïbi |
Biddn krâd irgazn n tmazirt an gh tama n talkrrusat lli yusin amadûn, tga yat talkrrusat ikkattân, igli t yan ughyyul icibn, iktarn s ujjîd, ur iccin la timzîn la alim, ur ifrdn abla gh kra n izûran seggannin n ifrskkl…
Dârat irgazn, llant ghin snat tmgharin d yan ufrux mzzîn yusin yat tubbuct n ughrum ighmln igan tin wass wassan, ar tt ictta… !
Ar allan, rksn imttâwn nsn s waman n unzâr llid ittârn gh ignwan tar ddafuniyya, timgharin gherghrnt walln nsnt s imttâwn, afrux ar ittrgigi s usêmmîd acku ur ilsi abla yat thidûrt ibbin, aghyyul ghed nttan iqqur s ugris d ukrram, immagh ad issus aman n unzâr gh imzgan nes lggwaghnin s tugt n waman.
Inna urgaz amzwaru :
– mmaghat agh ad nasi amadûn f iggi n ighariwn ngh !
– manik za rad as nskr ? amadûn ar ittgzâz, ar inddr !
Inna yasn wiss krâd :
– mmaghat agh ann nldi aghyyul ad ihrukka s tizzûmt n wasif !
Irar asd umzwaru :
– nkkin ssengh aghyyul ad ahêyûd, ur ann ig tuggas ns ad ibbi asif n waman, waxxa t nngha s ukuray !
Swingmn middn lli gh tfissast gzzuln, ibayynd uhânu n tdawsa gh tuggugt, ttuqqan tggurt nes, issutl as wallagh d ublûz, ittâf yat taccrjêmt irzêmn s imik, ar d tmmal is ghin illa yan ufgan. Ghwan ad igan ahânu n tdawsa gh tsga i uggar n mraw n igiman n imzdaghn n idûran d ifrtan, ghikan af icqqa unyalkam ad lli igan yan umuddu ighezzifn ur itthuyyun.
Inna urgaz amzwaru :
– urmu yat ayyi tawsm, rzêm at idârn nes, nkkin rad t asigh f iggi n tghrâd inu.
Ssentin inzârn ard ttârn s gigan, asêmmîd ard issknu ikccâd qqurnin n taddagin gzzulnin, ndanin, aylligh akw immagh attn iskittî. Ar ssefladn indran n umadûn llin ikkumn gh ddu n yat tefrsâdt ibsusn, ur irurn tafukt ula asêmmîd, igh as islla ufrux ar izêrra imttâwn n mas ard ttârn, ar ittâmêz gh ihdduzn nes s kullu ma mu yufa gh tkssâd.
Inna ufrux :
– is rad immt aymmi ?
Mac innas ur as trur, tesighzif afus nes, tsustwu tafrsâdt lli gh iggi n tfkka n umadûn, s ghikann afd ffin kra n waman lli munnin gh inudûtn nes.
Issnti urgaz amzwaru, isurrid yan unfus lli yas lâh, ifinn tighrâd nes i talkrrusat, mmattin sin an yadênin sersn d fllas amadûn, ishûssu nit gh uzmz an s uzâzûy, immagh ad yizdîr, timgharin nttnti sustwant gar tafrsâdt f iggi n tghrâd n umadûn.
Tddu trabbut ar tbbi asif n waman, ulln ijàad nsn ar iggi n ifaddn s gigan afad ad ur rttfn.
Tdda kullu tfkka n umadûn ad tdêr gh iggi n tghrâd n urgaz, mac lkmn tt ifassn, ssurrin asd sgiddin ast dagh.
Inna urgaz wissin :
– ssutrgh an afigh ifrmliyn gh uhânu n tdawsa !
Iggut unzâr, ixcen lmnzl, macc amr yan ur ifrik i mayann abla amadûn llid issfughn indran mcukkanin madkanin.
Llighn lkmn ahânu n tdawsa, sllan I yat turart ard ttffugh gh yan rradyu, shûssan s unaruz acku llan ghin ifrmliyn, tnna yat tmghart :
– rad as zzerin, fin as isafarn, ilmma ijji !
Inna urgaz wis sin d nttan ar ittlli gh ugudîl n uhêfûd ns :
– ixassa ad asn nf aghazad afad ad ddingh bahra biddn…!
– Tghwzant a gma !
Tghwli trabbut d kra n iskfwal drusnin, biddn f iggi n yat talastêwant, ishûssu urgaz lli yusin amadûn s rremmuyt, isurri tighwrâd ns s tsga n ughrab n uhânu n tdawsa, immagh at issaki s ccur, macc iffrttl as, inna umadûn ttâx idêr f iggi n wakal zund kra n talxnct izzâyn llid idêrn gh ignwan ! knunt tmagharin sendnt amdûn d ughrab, argaz wissin ar ittnqar taggurt n uzzal igrsn s yan uzêru. Ayt tdawsa ur asd rurn, ula uggand srs abla lligh zrint mnnawt tusdadin !
Tuggad yat tfrmlit igzzuln, tlûhn yan izêri f umadûn.
– matt yaghn ?
– ur nssin !
Irar asd urgaz wiss krâd :
– yudên bahra, aynna icca ar tid ittrra.
Tnna yasn :
– asi yattid, tccukkum tid, adêbib ur rad yack abla igh izri uzkka.
Yettyasay umadûn, sekcmnt s yan uhânu, srsnt gis, tafrmlit nttat tdda s yan uhânu yadên, ur ghin tlli abla nttat d yan ufrmli, afrmli yughd gh iggi n ussu, yini yas:
– yan umttan yadênin !
– hâqqan !
– man akud rad nhiyyu tagharast ad n tudrt ?
– igh ntahl nkkin dik !
– kmmin ura tswingimt abla gh littihal d tmghra, ara ttjijiw, nkkin ura swingimgh abla ad urrigh s tamdint inu !
Lligh tzri tizi ighzzifn n umsawal grattsn, inna yas :
– zayd finn umadûn an kra n isafarn mahêdd urta immut.
Ur ismuql ufrmli gh tfrmlit, ar ikmmi yan ugirru n casa, isujjû kullu ahânu yan s wadû ns.
Tffeghd tfrmlit, tsmaqel gh udm n umadûn, tggr i wul ns, tsrs afus ns f iggi n ugayyu ns, ur akk txmmim gh tmadûnt lli gis illan. Tddu s uhânu n tghwrdin, tawi d gis kra n tssgnatin, tut yat umadûn, tini i tawja ns :
– adakk ur tiksîdêm, hati rad ijji delhînt !
Smuttln ghwilli amadûn gh thdduzt ns, asin tid s bra, aghyyul arasnd ittbayyan gh ugwmmâd an, urrin s ighrm nsn !
Rachid Najib Sifaw
Amawal / lexique
Ahânu n tdawsa : La chambre de la santé
Iffus : le sud
Tawunkt : État
Tubbuct n ughrum : Un morceau de pain
Akrram : Le froid
Amadûn : Le malade
Tafrmlit : L’infirmière
Delhînt : Tout de suite