Said Sifaw el Mehroug
|
Amusnaw
|
Amezruy nnegh
|
|
A win yelan d amusnaw
sestengh ak rri d awal af tsisut n tsisaw d matta i midden temmal îd nât tedrez tawurt d netc af tizi nuddem urigh ufigh tira af tamurt wel ukzagh mammu tt yersem ghrigh d drigh maca tawurt tuls tekks felli nuddem imeqraren n tmura dêsun fellas ansi krurben ghilun tt d tin tadêsa negh d awal n iderwicen susmegh fellas an assa jetca mammu yessen taluft târu yellis d ass iduggel d aseggwas ansi tuwi t d yadjis d agujil gar aytmas tfut tbed af udem is d nuddem yerwel fellas |
Amezruy nnegh
Ulsen as tira Ksun as tidet D urint s taba Am ighfawen nnegh gun ten d ighemba Netcu taglilliwet Terjij tasa Ucerrik mqqer Yus d di tuma Amezruy nnegh Nghunt s tadêsa Yeqlulla di blem D yuden si taqqa Awey t yalu In yal tmura Suter t ad yekker Atû n tmmuzgha Atû n tilelli Atû n tegrawla Amezruy nnegh As neg twiza D nennêt fellas Yal mani yella Am awal nnegh a t nan kasâ Ksan wi ksan Ira wi ira Ay imedyazen adel t tameghra |
|
Tidet
|
Tzâllit
|
|
Tidet tuden tt tagut
Tagut tughal d d blem Tidet tûta di tanut Yegulez ukerfa d ulem Tidet tughal d amzîw Ugdden sis idurar Amzîw yessufegh d afriw Yufag in yal azaghar Yal cara a tt nettu Maca tidet t tafukt Idj mmas am asafu A taden udem n tamurt Ay anubi n imir a Imal cek d nemmatur A lmed idles d isefra Ayetca senzî andur D medya netc d wezdad Win yal indar n tmazight Uzzelgh agar lâz d fad Tidi nnu gigh tt tinigt |
S tmekrra n Nana Tala
A nezzlala al temuzgha Mani tella A nkker argaz t temtût S tanemmirt n Lhêwari A cem nari A cern nenki in tziri D neg blem d neg tagut S tmusni n bu Hâtem A cem nellem A cern natem A cem narem Agar ilsawen n temdurt S tayat n imesnawen Imaynuten A cern nessen A cem nazen Tabrat n idels wel yemmut |
|
Timmuzgha
|
Fad
|
|
Ah ! timmuzgha
Assu tessa Abrid nnes, termu Libya Tkkes taqqa Turêw ara Tesskker anegh tagherma Di tamesna Neghd ajenna Di kull imkan n Libya Terrêz, tûta Wel tuc tella Idû tkker, tansa tansa ghsun a tt nemhâ Bac a tt netta nkker nuri tt tin kasâ Nuri isefra af timmuzgha Nesfêt tikerkas n icenga Kkren d ayetma D imezwura Zzêlen di brid am tlifsa ! Mlun la, la, In tirrugza Tin tamusni d tin tussna Nûta s tdêsa Af icenga Rwêten iglimen n aytma |
Anazâr : yugga t s fad
Tamurt tssufegh t arsêt Arsêt ikker d ssâbt Lâz nnegh issetct fad D fad wel yuc ittennêt Fad, ittccur adan D yemi ittcur ighfawen Yuzzel idêsa am usman Yurar ittari, iseffêt D fad wel yuc ittennêt Isffêt tidet n amezruy D yuri tidet n tkerkas Irni ikki iles nnegh D ifek anegh iles wayêt D fad wel yuc ittennêt Anzâr yugga t s imêttawen Imêttawen n mass ik nnegh Iwwet s ideflawen n fad Ittcur tebhîrin s arsêt D fad wel yuc ittennêt Arsêt iwwet ul nnegh Itccur t d isserwêt t Ittetc aysum d ighsan T timentâl war izêkwan D fad wel yuc ittennêt |
|
Amarir
|
Fragments
|
|
Ssfrugh ssfrugh
Ur ufigh amarir Ssfrugh in tilelli Wa sufigh agadir Righ ad zengh tabrat Yuggd ad yas adbir D taggar zzfegh Ssufghegh d awerwir Sligh udjag yettinig Yettinig yal imir Zêrigh usman yettari Assu ufigh amarir |
Ssergh iy d taftilt
Ghssegh ad nnêtgh Deffer bunadem D alemmas n azel Ufigh asefru N Si Muhênd U Mhênd Qengh t d tziba D utefgh sis ilel Dêsigh si ufigh Ilel d jidi Ssagdegh tiwdi Sedêsgh adfel Ghesgh ad afgegh Fk i d isufag Ad d awigh itran Ad rêzn bugel |
|
Tawes
|
îd-nat
|
|
Sligh in Tawes Àmruc
Kmigh dids izêkwan Ddergh saddu jidi Ansi d kkren ttsiwlen Imazighen imula Skkren id s tanemmirt Sligh tinigt n tagherma Sligh anya win tagrawla Ghrigh isefra inggura Tanemmirt in yal amdan Inki d idels n tamurt Sligh Taws tikkelt idên Zêrigh ilel n imêttawen Mitigh memmek a t sefêdgh Ufigh ighd d tkanunt A lala ulac twiza Ighfawen nnegh d ighemba Yuden ten ighd n ighd A lla Taws ssurf iy d (...) Sligh Taws di Ujla D rnigh sligh as di Ghat Tkker tuzzel am usman Ansi tewwêt in Siwa Tinig s imêttawen nnegh Tessekker dinegh takurt ! |
awal yelan d-amsnaw
af tsisawt n tsisawt ad mata i medden temal îd-nat tedriz tawurt d netcin af tizi nuddem urigh ufigh tira af tmurt ur kzagh mamu d yersem ghrigh d drigh lacen tamurt terni teks fili nudem imeqqaren n tmura dêsen ghfi alsi krurben ghilen tit ten in tadêsa nigh g awal n iderwicen susemegh fellasen assa d ayetca mamu d yesen taluft a taru yellis d ass ig ugel d aseggwas assi tawêd-i yedj-is d agujil gar aytmas tafut tbed af udem is d adin nuddem yerwal fellas |
