Lucien
Tarurt n Brahim Lasri Amazigh
|
Lucien imun aylligh iga tukkimt, idârn ns zdin d ugayyu ns. Tasga yan agh a ittafa ixf ns yihêml t. Ur jju isyafa s usunfu zud ghwan lli gh illa, yummer. Taghssa ns akw tlla gh usnfu, tifsus. Ifssus zund kra n ifr, kra n usgunfs ur izzâyn, kra ur akw illan. Zund igh illa gh ignwan yawit wadû ngh yan iddern gh tuzzûmt n waman, ifjjij, ifjjij, ifjjij. Ur ikmi kra n ladrug, ur iswa kra n unzîr, ur yut kra n tassmi afad ad yali gh man anaw n gh usunfu. Lucien yufa ixf ns, yummer s tudert ns, tumert ad, ur nnigh is ira ast idru d kra n yan yadênin ?
Yan îd, inkrd igllin zêmant kra izêbbarn hrcnin, zu fllas mmaggarn sin uzêlan msadnin, tudêrt tazzâyt lli fllas iggwizn. Ma iga gar an lli fllas iggwizn ? Max nttan, max ad ur iggwiz f kra n yan yadênin ? Mani gh d igwra tagat an ? zud igh at ttawkn sin kra igat yan gh yan usga, srsent ar fllas tggwizn s ukuray ilhu nit igllin ar isghuyyu : « Nkki rad mmtgh, nkki rad mmtgh. » Iqqen tiwallin ns yaj ixf ns i tmmara ns. Iggammi a innru angi llit yusin. Tafrawt llit yiwin aylligh n yaggug d tagharin ur ixalêd. Iggami ad sul immas yumzt kra umndaf zgh ixf ar idârn. Ar tin ittawk kra n yan ur issn, tamzêt tuweda. Ar as iskar uzmz is a isseflid i yan uzawan idran. Irmmi ur sul gis ma itmaghn. |
Tawlaft n Umazigh Lasri (2 isgwasn d uzgn)
|
Isyafa is dis ur illa yan gh trfuffnt ns, iga yan i tmmara ns ? Ur izêdâr yan ad as yaws. Inna ur isker s ixf ns ur as illa, iqqan d ad iffagh ikd agharas an.
Izûran n ugayyu ns ar kkatn, ar t zziwizn. « Gh ass ad a igguran » inna t dagh. Iggammi ad dagh immas.
Yan uzmz, azêbbar iggut aylligh inna is rad ingiri d ixf ns imik ikkatî kra gh tghssa ns. Yan usm imik urt isbukêd. Uhuy ur d usm, yat tifawt iggutn, izgan. Yat takkat tjder turin ns. Iffi yat tghwyyit isqqaqin. Tizi lli gh t tumêz tfremlit gh idârn tenna « Iga afrux ».
Lucien ilul.
Izûran n ugayyu ns ar kkatn, ar t zziwizn. « Gh ass ad a igguran » inna t dagh. Iggammi ad dagh immas.
Yan uzmz, azêbbar iggut aylligh inna is rad ingiri d ixf ns imik ikkatî kra gh tghssa ns. Yan usm imik urt isbukêd. Uhuy ur d usm, yat tifawt iggutn, izgan. Yat takkat tjder turin ns. Iffi yat tghwyyit isqqaqin. Tizi lli gh t tumêz tfremlit gh idârn tenna « Iga afrux ».
Lucien ilul.
