Tangult n urfan ghwemanin
Iwenx i tsawent, tekki d kra n tidi semmîden igenzi, ar tt issighâr imik n uzuzwu n tdeggat lli d isûden f ighezr mad en yad tdêr tafukt. Swerx f ifaden lligh ar qqelayx d iseras ittawin s tseqqift n tgemmi n Dda Ali, igh yad ur tssent, afus nnex, ur ed winex nekkin idk, mac win urgaz inu, af yella ad ibidd ar kigh zrint tensayin [1] ittnurzûmen aseggwas. Lligh dars uckix, gex tamghart nnes, ad usix tamasayt ad. Kraygat tizi yan gh useggwas, ar ed lkemx Dda Ali, nettan yella gh ufus n Ayt Brayem, yan gh ifassen qqebrnin n tmazirt, ur ids nessar [2] yat, amer inkan n tensayt ad. Ar tid lkkemx, nasi tarezzift i ccix, nesli taslit llid ittawi yan ufus yâden gh yan usun en yaggugen, kkusen awed nettni tamasyt ad gh kra n ifassen nna mu yega uzûr nnesen yan udrar en yaggugen. Tssent ulman n taysiwin ghezzifin, ur ttâfent tasekiwin nnesen tigecrar gelden ifassen negh idûdan. Ighezzif wawal, adj iyyi ka ad ak sawelx f useggwas lli d izwaren akeccum n ayt lmaàden s tmazirt.
Tsers ed Lala Xlij talebradt n watay, ar tt texllaf, tergha tfust nnes, tamêz tt s tesga n tzifalt, teffi yyid yat talkast mezzîyen, ssux en gis imik, sersx tt f iggi n ugertil, ar ttqelx s usmad n wallas nnes. Lala Xlij, zun d akw tugget n ineggwa nnes d tneggwa nnes, irkes umesdul nnesen d umesdul nnes, idrus magh ufan ad sawlen f kra yâden igh en ur ssekcmen ixfawen nnes gh wawal, igh ur mlin man tasga gh iwsen gh kra n temsart [3], man adêrf iwin gh iger n tmazirt, d mad yegan adriz nnes, idîs nnes, d mad as en d ifl gh ufus, iggez ukettay tiserfin n imal d wawal. Mac is yadli illa kra n wallas, yeg it anaw nna yera, gh ur ttegzint tmatarin n walli t igwenan, nex wallit ka yulsen?
Tekcem iyyi
d yat tergagayt lligh en ur ufix afqir Ali gh iggi n umnar, isker f ad iffagh,
mekli bedda imyar iseggwasen f iseggwasen, ur telli mqar d tifawt gh tisetghin
n tgemmi nnes, ur illi wawal, mad as ijran? Tumêz iyyi tuccent iman, tggez
tawda ixsan inu gefnin. Sduqerx as s kra n tunfust lli sul ighaman gh ufus inu
immuten, ur ed isadmer yan, gix en sul tafasa lli gigi ighaman, s igh ed isawel
gh unwal:
– Xlij iz ed
kemmin ayad, dehî d ka imi, han ur akw iqqen, tekcem ed.
Dêhix en imi,
iseknazzî, felx t irzêm, zrix ar anwal, inix i ufqir Ali:
– Mad ak ijran
ayelligh ur thêyyelt tiklit ad zik, ghik s telkem tizi n ugewal, nekkni
urta nesker yat, iqqan ed ad neslkem tamegna yan i udghar nnes.
Yat temghart gh ufus n Lala Xlij, d yan urgaz gh ufus n Dda Ali ad isselkamen tamegna yan, mekli yyi tenna, i tgemmi nnes. Igh zrint tinwudec n wass as izêlin i temyurt ad, ar d ttasin yan ungul ar as en tid srursen kra n ifassen yâden, kuyan d twala nnes, d kra n tghawsiwin akw, slin taslit n ughanim gh yan waddag ar tid gis ffalen ayt ufus lli yad tebder, ddun ar amras n ccix, sersen ten gis urta lkement tinyîdes, adûn d ccen imensi, ffaghen ilmma mdden s yan usarag, hûcen gis s temlda n tmeghra n ccix, ansay ad ad ittenarzûmen aseggwas, ar ed ittacka urta telli tyerza, nettan amu bahra ssuguten mdden tawayt ad ur izlmêd useggwas, idêren, kcemen gis tammara d tgûdiwin. Azray n umnar iqqen aswingem n tmazirt gh tugget n tinsayin, ar smigilen, ar ttemaghen ad jenjmen ass nnesen, bden i twala ar kigh tezri. Tawala yad ad ur ssenx mad yegan azûr nnes, kraygat taghawsa tellan s twala, ar tamettant, immi ar bedda tetter i bab nnes ad as ibedd gh twala nnes, lligh t saqsax, mad yegan tawala, tenna yyi d is ka neghwi tawala ad ngwez akal, mac lligh as nnix max za ad iyyi tesmagal ad skerx kra mad iyyi ittesâhan gh tudert, lligh ur tegi amer tawala, ur iyyi tenni yat, tqqen awal s tguri lli mu yyi bedda ttales: " May an ad nufa ar ax t ttinin, hayyax nenna yawent, amêz at gis nex t tujjam, ayelli fellax illan neskert ". Yan gh inkan n tmazirt ad tega twala, mac mad idrsen, nufa d ar ax t ttinin, ur ssenx iz ed mdden negh ed tighawsiwin? Aseqsi yad as ur zdârx ad t inix, negh ed ad fellas rarx, udjix t ad yeg imik n tadêfi i usiggel amegrat f wammak s ssenx is ur yelli, meqar d gh umalu ittergigiyen n talebradt gh ufus n Lala xlij. Llix dars acku iserg i kra ad dûfx arram nnes, mac asrag ad ur ittêf asrag, iggi n mayad ittêf ghas azzaglu n ugellay igh ar nekcem ighladen zganin, mmutelnin n igwerar ttenunuynin n tmektit, d imula n ayelli s nnix, kigan d teklit, ighi ad yeg timatarin zwarnin n uluy inu izugen, ighlaghlen, innêdfren i unulfu d iwîz.
Ur dari kra n uzerf mas ttinix gix gh ufus nnes, s wammak yuman tadêfi n tamatarin, mekli dari dax ur yelli uzerf ad inix ur as gix yat, mekli ur sdux s awed yan ughrab yusin tiddi nnes, akettay nnes, d taghalin. Mamu za dêfrx nekkin, mad yegan tamagit inu? Ffagh ad siggelx kra n man yâden urrix ed, ar kwemsx ayelli s nnix yega gigi, ur gigi yegi, felx t ar iyyi d iqqay, lix t, ur t lix, ssenx t ur t ssenx, udîx ed ad mmentrax imula zwarnin gh udêfas n umiy, gh tigêdlt [4] n tudert inu illan f ighir n kraygat, mac mad ufix, ur ssenx is ufix negh ed is ur ufix? Asifêd, taslit, igunan, timezgida, umiy, Dda Mhênd, mad gix nekkin dârat uya, d dat nnes, man taweckint rad qqenx gh turtitin n Zayna, yegan ghilad tamedwult, ikcmen addad yâden, wad akw izwan gh tmazirt, nettat nit yurmen, ghas s imik, ad tmêdi imik gh tguriwin n isaruten, nex win tidlisin [5] kwelanin llid nesmun d ufzâz n zzriàa. Iggi n mayad mad siggilx gh ifessi f qqen mdden imawen nnesen ad t issanx, mar ad kerzx gh isemdâl iqburen, mar ad gisen asix, tawla, isîd, takrura tamenzuyt, ixef inu immuten kigan ayad, negh ed ghas ad iktayx tawala, mad gix nekkin i ink n twala? Is ur tgi, gh uzur n tidet, tamagit amarg neffal ar tid nettâda ad nissan is nezreg kra, is nesiggel ur nufi, is nemmut ur nesul, is nemqqur nimêziy gh umalu nnex, is tt ur yeg ghas imula n tghawsiwin, zêran ayt wammak izgan is gant asektur n tmatarin!
Lligh tedda Zayna s tmêsriyt, urrix ed ad genx ad syafax ayelli tesiggil nettat nit, meqqar as ed akw ur yegi adâr, mekli tega tawtemt ur tufi, tiglint, amer ad tedûf izrigen n ayt tuwja nnes, igh teffugh, rad tmmet gh ukettay nnesen, igh tt ur zeluzzin i tnûdfi zun d tiyyâd. Rebbi isghel ax ed f unecka, may ad as tgwera is iyyi t tenna, kêdix gis azûr n temyammayt, may ad ad yegan tadêfi n usghan igh is ifles yan, igh is isdu izmuzzâl n wass nnes zun d iflu n ccigh.
Isers ed
ufqir Ali angul iwlullan gh tensrifin mnid inu, isergh ed yat tsettât
ad iyyi sis isfaw, tifawt n takat ifdadren ddaw tikint ur d tezri ar dari, ar
iyyi immal kra, mac izêri nu idrus, ur zêrix yat, ar ttergigiyen
izûran n ufus nnes:
– May ga ghayenna
a Ali, nekki ur zêrix yat, inix as.
– Mad ur tzêrit
a Xlij, ur ar tesmuqqult yat, ha yat tenqîdt tazeggwaght, ha yat tseggant,
ha tazalgumt, ha... ha..., meqqar tent izêra ubukâd.
Zenzx en ixef ddaw
tifawt n tsettât, s agh iyyi d tenssisent tenqâd kwelanin iggi n
ungul lli, ssufsexen gh idmaren inu, allex allen s igenwan, inix:
– Ya Rebbi ad
fellax tsserxut ma fellax ittyaran!
Idel ufqir Ali angul,
ar gigi ismuqqul, ur ukwezx yat gh izêri igh ur yeg tanatamt s ttutx nekki
nit, ur djun nzêri nekki ula nettan angul ighweman, ar aseggwas an, mekan
akw af ax ur issiwed ayellid igguran. Imi n useggwas agh ttafan mdden timitar,
igh mmaghen jjenjmen tilli ur irêzin, igh ur mmaghen ad sul ur allan i
ufxar igh as ilûh ughyul, d is agh ka issusus aclif ikk agharas, mar ad
injem gh ideqqi igh issuden akal? Ghemkan d temsarin n darnx, aseggwas isker
tadûri n ufxar, ssussen mdden ticelfin nnesen qqen imawen nnesen, zun
d igh ur izri yat, dderen izemmulen gh wulawen. Keyyin igh ar tesiggilt iferray
n tezlafin rzânin ur ak t ikkes yan, siggel magh tteggat iseggwar i temmara
nnek, nekki dis ak ka mlix illigh ed yut uneffir aghyul n usun.
Zik ad ax nnan ijla ugharas n ugewal i mas n Sufya, meqqar ar as tsseflid ur tufi man agharas is tekka, Nekki d ufqir Ali nsselkem ayelli fellax illan, nesrsen tamegna lli gh udghar nnes, nurri d, ur djun nzêri yat, sul iqqil rebbi ifassen nnex gh ayelli yuten darenx, anna ur yegin timeqqit n waman, may ad ijber d akw sers rebbi timegniwin nnes. Ur nufi mani yas nekka. Sul attân izdin d fad d lâz ur ar iffal izemlan dranin zun d willi iffal uddur igh d idêr, igh is ilûh ifexxar.
Tasi d atay f tergin tsers tid f iggi n tatâblat inniken, ar t ttexllaf. Zrint tinyîdes, mac nman ukan sul f takat n wawal, ar yadli ttinin mas ed atay ad ittenurzûmen i wawal, nettan ad yegan babas n ummedrz, nekrx ad ffagh lligh swix wis sin lkisan n watay, tasid yan snat talluzin teg iyyi tent gh uqeddam, ssudenx as aqellal, qqenx ed imi, nettat tghama ar tesmun irukuten.
Ur ed nettat ka ad iyyi isawlen f ungul ighweman, ar akw sis snalen mdden ghilad i uzemz an, mekli illa useggwas n lbun, aseggwas n lâz, ayt darenx smdend aseggwas n ungul. Menck n yan ad ak innan yufan tadeggwat, nex ass yâden angul ighwema, willi yakw ssenwanin s tefrant gh llan urfan n tesga yan gh usun, nnant, nex ed ghar kra gisen.
Saqsax tamghart
lli iskren angul îd n usifêd, mani gh ed tiwi urfan, ar teswingim
imik, ar tagara tenna yyi, irwas iz ed tama n uzêru lligh teggan mdden
tadût ar gis ghwemmun ulman, mac tesmed tini yyi mad rix awal an, ur igi
mad addren mdden ad ur yâdu, yan ur isfaw tageldit n rebbi amer nettan,
nettan ad gis isnaran mekli yera, d mekli tt yera, ur negi imasuren [6]
i rebbi ad dids nssanun awal. Slix ed gis kra n urfan, gex tenin gh tefrant,
lligh as sserghix ad en ikcem Muhêmmad, yafi yyin ar tgerrasx agherum,
ur iyyi inna yat, ghar yut s ufus, izemummeg i tâdsa ihêluccegen,
iggawer gh tama nu, yawes iyyi, smaqqelx gis inix:
– Rix ad skerx
angul ighweman?
– Mani gh ed
tiwit urfan?
– Dar uzêru
lligh tend tiwi Fadêma n Ayt Muhêmmad ass n usifêd!
– Yak ur ten
tessurdt!
– Max ar ssiriden
mdden izêran n wasif!
– Nnix ad asen
ur tkkest aghmu lli ittâren i ulman.
Negan angul, ar netqqel
ad inu, idîd gh ddaw tajlabiyt yat tebninist mezzîyen n waman, yega
d gis kra n waman n tudert, inna yyi ma s tefulki, ur akw immatêl ttuyaskar,
sul teg tin usemmagel [7]. Isers tid, iffi yyid yat talkast,
iffi yat i ixef nnes, ar nettqel s ungul ad ighwemu. Fulkin dari waman n tudert
igh gan win tiyni, ur ssenx man agw ad t nnix i Muhêmmad ismagel fellasen
yan umeddakwel nnes, nettan ad asend yiwin tadeggwat lligh d ikka ssuq. Ar iyyi
d ssiktayen asdêl akw ighban gh tudert inu, qaman gen akettay, taghufi,
zun d tamagit, acku idrus ad ten taft, azwag ur akw gis llin. Neddan i tebninnist,
ar twirriyen ixfawen nnex, Muhêmmad isat yad ar idêssa, ar ittirir,
nnix as ad isker kra yera sellagh idês, mamu ra yyid ifel, igh igen, nekki
zîx ids, idrus igh ed yucka, igh d yad itters, ikk imik yayel. Allen nnes
ar ed semrqiqiyent gh tifawt n ufrran, nusi d tangult ighweman, nsers tt mnid
nnex, nnix as a tt awix i Lala Xlij, izêr gigi yini d:
– Igh tnufelt
tawit as tt, as tt ka tzêr s tusi taccemàin i kra n ccigh, tghal
is kid izza kra, is kid ilkem uslay acku ar teqqazt tiserfin ttun mdden, is
kid gisent isli kra, is d ira kra tamazirt, nex ghas afus nnek, ttu may an,
nekki ur d hêra ssenx mani d ikka uslay s tmazirt, acki d ad ak alesx
mad en ilûhen Sufya i tnûdfi.
Iffi yid talkast yâden,
iffi tayyâd i ixef nnes.
Awal lli yak inna Dda Mhênd ass lli as meqar gis tebdit ar teqqaz t, tsemd as taguri igezzulen n Ala Xlij. Usun ibed f ifkra n n tisit, ku tisit tenqren gh tayyâd, ar akkant udem irkan nex wad ighusen i teghzanin n wawal, ur ar izray kra gh id intel. Sufya, teglint tagat nnes ur t igi amer lligh en tuffa taàyalt nnes, nettat d tiyyâd d kra n irgazen ur tssen, llant gisent tid ittahelen, ilint tid sul ganin tiàeyyalin, ghalent is tedda ad en trûh dar ayt dars, acku argaz nnes ur illi, ghêrent i imeddukkal nnesent, gen ten imensi, mmedrzen, lligh en fellas en tekcem Sufya, ur as en tenni yat, tezri s tmêsriyt nnes ad tgen, ussan, aseggwas n ungul, ur tssent mad ikcemen ula mad itteffughen, ilin nit ginex, nekni, mad ikwêdan adû n idrimen lligh imarc lmaàden, ar issekcam ar iseffugh, yat teklit as ittawi wasif ur issen turtit n ugurram. Nnix ak yad mezzîyx, yallah dari tezâ iseggwasen, ayelli mu ka ssefledx, d ayelli f ak saqsax, ad ak tqqisx, awal ad tenna yit yat tefruxt gh sseqr mad yad nella nekkin ides, rad ak sul fellas alesx. Lligh ten tzêra, ur ssent mar ad skernt, taàyyalt nnes teksûd gh gwemas, tini mas rad t lkemen ineghmisen, ineghmisen n ddu ufersâd lli ttinin ayt darenx, mar ad skeren, may an ad swangmen, zik afen ed mdden Sufya tngêd gh waman n tnûdfi, tlûh en ixef nnes, iqqen tid imi n imi nnes.
Ur ssenx
max ad zzigzulen mdden asiggel n tidet s zun d isekkiren ad nemyar gh umiyyen,
max ad tegan adêrras, meqqar iqjer, ssanfen targa i ussifen n iman, max
ad yella gar f irid, meqqar yeg irid n waggagen, ar ed iffal imesrdaten qquren
zun d attân? Max! Max ad tdder twala gh tgûdi n tisit? Iseqsiten
ur ilin tamrarut, max is sul rad ighama useqsi igh ittufsay, may ad af dari
gan iseqsiten. Ur ssenx man afelsaf yennan mettad is immut kra n yan yurri d
ira d yaf afessay i teglult tamezwarut n tmukrist n ufgan, mac mdden ar ttemtaten,
ghaman en, ighama useqsi yeg aseqsi, mkan d kigan d tmatarin nmaggarx gh imula
nu zrinin gri d tamzirt; Mdden fran tent s isekkiren mu ur gin isem, qqen is
aginan ifrin, nekki skerx gisen tifilit i umuddu nu yâden, mad ssarx d
twala n tmazirt? Amarg, imula n useqsi, ur ssenx man tawala dûfx ad iyyi
telkem? Ssefledx i usxurri n Muhêmmad s igh tensa tifawt n Zayna nmuggurx
en ids aseqqif illassen, Ar gh id, ur rix ad ldix tiglulin ggutnin d Zayn, rix
ad en aggugx s imik, meqqar d tusi ticelfin nnes ad ten tesuggu f inerfal inu,
ur ghix i mad sul ttasix, tella gh tama nu, yat yâden, nettat nit, mac
syafax tt tennfel, ar en gis ittebbi wawal, mad as ijran zegh idêgam ar
gh ass ad, tenna yyi s yan wawal iggurzan mas en ur ikki idês tîtt
nnes lligh nbêda îdgam, ar teswingim gh waddad, mamu sul tega, tiwargiwin
n mêzziy, meqqar asent ka tules gh tidlisin nex isaruten gant kra, kra
idran, kra tesyafa ifrafer gh idmaren nnes, ur ed zun d addad izwan zun d abazin
mu tdêfr ghilad, ad terwel, ad tengh ixef nnes, ad ka tezîder ar
teffzâz igzâzen ghbanin gh ul nnes, ur tssen, ur ufix mar ad as
inix, usix ad as sfêdx imettâwen syafax rghan gh tama nu, tdêr
d felli, ar talla. Afgan ar izîdir ar kigh yufa man agherab f ixellu idêr
ed fellas, ar ittebiddad ar kigh yufa maf iswur igen fellas. Ur ssenx max ad
kwetix amarg n temddukal gh Bariz, max adrara yad n Zayna ayellligh yin ilûh
gh udghar lligh ed rwelx.Yan wass bidx, ar ttematarx awlaf an ed yiwi uswingem
n ughrab, ur sul ed iwix f man addad zêrix, negh zrix, lligh sul ur rix,
nex ur zdârx ad gex aghrab n imettâwen ad kkix i tadêfi n
tdukla, frekx is nit drarax nekkin, ur t gix ur as gix, bdûx ikerwan inu
i tiswak n uluy d tissi, ar ttecalax s marur. Tanana n udrara tesaghi tuccent,
ar kwemsx targagayt n Zayna, ur sul ssenx mani mu gix, ur tedrus tghufi iman
d temayammayt!saqsax tt:
– Is jjun tsella
f Sufya?
– Ur t akw ssenx,
adjen ad fellas sellax!
– Talli n idêren
gh tnûdfi kigan ayad!
– Tssent ukan
is ten ur kkix iwix tt gh ineghmisen n ghid, meqqar tin tekkax, s agh ka gis
zrayx. Max ad iyyi gis tesaqsat?
– Ghar kwetix
tid lligh sawelx d Lala Xlij ass ad!
– Nnix iz ed
kra yâden.
Rix ad as
jlux awal an, ar sihêlilx i wazzar nnes, îd ay ad ur telsi tadghart,
tudjat idêr ed f tgherâd, tqqez gigi gh tillas, syafax izêri
nnes ar en ittâr, imik, syafax unfus nnes, ar iyyi tesudum, ur rix ad
en ids utx agharas, mac aman n tudert uden i ixef inu, nekcem s tmêsriyt
n izdar. Asxurri n Muhêmmad ar ax ed ilkem, ndêren ger usu imanen
kigan ay ad, ur ssenx mad issimimen tayri igh idêr yan gh tgûdi:
– Ur ssenx is
tera ad iyyi nit sul timmim, kcemx tt gh iwil nu s gar azemmazêl! Is tellit
keyyin d kra yat ghin gh ttilit?
– Max ad iyyi
tsaqsat?
– Trurt iyyi
aseqsi f Sufya!
– Uhuy, ur llix
d yat, mac llix d yan d en dêrx gh ugêdi, ar ed neghli nafûd.
Rix ad as inix tin
ugherab, mac fessax, is rad t nit takwez, is rad gis tghêr kra yâden,
udjix tt, nghama ayelligh isawel Dda Mhênd, teffagh ad telkem tamêsriyt
nnes. Lligh teffagh ad ed inker Muhêmmad, ghlix dars, yini yyi:
– Yalatîf,
ur ar kin ittekka idês, nekki hêrmx ad ighli may ad s ugayyu nu
s ed idêr rric n tît inu, imla zun d win isbassayen [8].
– Zêrix
Zayna gh ass ad!
– Tennit as kra!
– Ur as nnix
yat, dis d ka nkweti tibratin n zik!
– Max tekkit
ten ar ids ttenyilkimt!
– Yah lligh ar
sul taqra gh Merragwec!
– Tiglint, tebbi
tasa nu, ifqiren ad igh k ur nghin ur ak mlen mani itteffaghen, illa sul gis
mad ittkes ufus.
Ur as nnix yat, zwarx
as ad nekcem s tmêsriyt ur tad ighweli uzal igh nufa ad en nqqen allen
imik, imlul ed iggi n tedrart, ar ttensan itran, agêrd n Dda Mhênd
issetgh igenwan, ar ed ittasus gh ughzan n tmêsriyt, mdix asen agiwal
ad izzugez kra n tmelli s ugunes inu, ad ttux kigan, anzîr [9],
Zayna, dêrend wallen inu, ur d nkerx ayelligh azênt tizwaren, ass
ad nesker f ssuq, mac nekki dids ur ed nnker, nera ad en neg imekli s igh ed
tucka ultmas n Zayna ad ax en tghêr s imekli, ttux akw is yadli didenx
isker Baba s ad en dars necc imekli yan gh ussan ad.
Nessird udmawen nnex, nesmun lkisan d ayelli d yagguren, neffagh, nufan Dda Lhâj issers ed yad ifeckan n watay isseqandel gh uzur, neggawer, tefk as ed Zayna ad yaàmmer atay, tad i ixef lligh idenx tensallam. Tlûh ed tazifalt f ixef, ar ed ittagga uggernuz. Îdgam, azzar nnes ur yusi timitar is jjunt ikka uggernuz, mac ili nnes gh usun, tamedwult, igh ufix ad alesx i tguri yad, isers fellas azâzu n kigan d tghawsiwin. Amur nnex ur ad t ikkis gh isêttaten tezdâ tensayt gh wallaghen nnes dranin ad ka negrawel f watigen gh tsega tadugamt n idêrisen n uzerf, nex idêrisen imegraten n wawank [10], zun d ad en nesmd assurf i izerfan n ufgan, nex ad nesawel f tderfit n ufgan s ixef nnes, tawuri tella ginex, nekni, ad nemmagh d igedfan n teqburt gh ixefawen nnex, ad nellil ger ax d ixefawen, ad nkkes izâttiwen n tawja, ad nrêz izdayen dêlanin, nniken, tsers tensayt, teg ax gis zun d tirufin iggundan [11], lligh zêrix addad n Zayna gh tgemmi nnes, zêrx tt kigan ayad, sselax i usemammi, ad sghelx adriz n twala gh ulawen nnex, ad ssenx is sul naggug idêrfan gh imal ijjijen, imal ur ilin ansa. Kwetix ed kigan d imeddukal inu gh tesdawit lligh ar nnesnnefka imnaden nnex f tmukrisin n wamur, kkix ten gix bda mgal tagrawla ijjijen, tagrawla iggigen, yegan zun d aggag, mekli s ttinix, nnix asen, ad nesxurbu ixefawen nnex, nesat ar tt nesku zun d agharas, tagrawla ighraghren ur tegi zun d tad indan, ra tettây s wanaw yâden n tdiktaturit ighin ad inneru talli f yad negrawel, iceqqa ad tilit didsen gh yat tesga n ucwariy, tiwetlin lligh neswingim ur ar ttadjan yan ad izêr tighawsiwin s umnid isghlen imyagalen nnes, ussan ad lligh satx ad kerzx tidêrfin syanin, zganin n mdden ad idra uswingem ad gh ixef inu, ad is felsx uggar, satx ad gis skerx tiresal n twengimt indan gh uluy d tizwirray.