MANI D-IKKA WADU ?

HAMADI, TRADUIT PAR AG WAWELKAZ

      Da yettwanna, g wakuden iqburen, nwis irgazen ranin ad sseknen tayri nnsen da rezzun ghef yuwet n tmedda ger tinna yezwan mennawt n tikkal nnig sa n yillen. Kraygat amaray da yakka tarezzift nnes i tmedda ad as-tt-nn-tesselkem i tenna yas-izedghen g wul. Walli yakkan kigan degsen da yezrezzif mraw d sa n iseggwasen g tudert nnes. Ar ttafraw tmedda tekk igenwan ar akud nna g nn-tuwed awettas nnes ters ghef ufurek amajgal n yuwen useklu n tazart terzem i wagim d yat n tezlatin igan tarezzift i ymarayen akw n wakal-a.
      Ur da yettakez izen n tmedda ghas tamarayt ilan ul ittnarzamen asag yukey d kra n ummergig n tarenfalit.
      S tgharast-a, ayed ittwannan g ikalen aggugnin n unzul, as da ttazzalent tlemziyin gher willi yasent-fernen wulawen nnsent.
      Ur nsul, nekwni, g tallitin n tfelsin timenfusin. Maca, ghef yuwet n tmettut ilan tamughli n urba akwd uzmumeg n tnezzrit, mecta d argaz ayed illan ghef tgemrawt n tmedda...

      G wakud ngum n wakud, g tmura-ya timaggugin n unzul, tella tudert n irgazen izerwalen amm tizzerwelt n yizriten nnsen. Ayyur deffir n wayed, tasemhuyt deffir n tayed, aseggwas deffir n useggwas, nitni mek zedghen mek ggudjan, ar ttsaran g tnezrufin tizegrarin tihrawanin ittfen seg waman ajgulnin ar aman ssusemnin, ger twargit n ufgan akwd urmay nnes.

      Aseggwas-ad, tessken-d tghurart, s tghennant nnes, tizemmar s treggwey asgunfu n irgazen d yides n imudaren. Sruggten waman, amumen imula g ittumday wakud izerrin. Temmut tadfi n iseknaf itteggan anya i twada n wussan amm tsuraf tibazayin n tsednan nna ssermin igharasen ughzifen ittawyen gher wuna negh tighbula n waman. Ghufant tadsiwin-lligh ittcerciren ar ssemdazent tawsit akwd imettinen nnes...
       Immug ugraw n imgharen s ughiwel acku yedrus wakud, ar ttemraran yirgazen awal ussan d iyyaren. Taggara, ffghen s tidet-a tar takna: Ad iddu yuwen ilemzi g ughref nnsen ad igru yawi-d ineghmisen. Ger yismawen ittwafernen yuli yisem n Melway Afalkay; netta ayed ifren umata g imgharen ad isawal fellasen, ad ig amazan n Imazighen.
      Amengher, sawlen-as ssefrun-as tixxitert d ulghat n twuri nnes, ssbeghsen-t ad yazzel gher taganin n Ugafa Ineghbi ad irzu ghef Yemma Tametna.

      Ar isseflid ilemzi, s tsusmi, i wyenna yas-ttinin imgharen n tmurt nnes. Iqqim-nn umeqwran g imusnawen – igan awessar g iwessaren – g tesga n ugraw. Iddegh temda temnilit, kra yedda gher twuri nnes, kra gher wurar nnes, ilagha-yas-d umghar i ylemzi gher ddaw n yan useklu aqbur n tazart. Iga tighimit n ugennay isgher izri nnes g igli yeghwman s wagu g temrilt-a tamazuzt.Ur akw mnalant tmughliwin nnsen, yan unucceg afessas as as-issuter ad iqqim datas, inna-yas:

      - Mayed teswanegmed, a memmi, g teghtast n ugraw?
Irar-as Melway inna-yas:
      - Ilghet nwad ittwafren yan a Mass!
      - Texsed at-taghuled deffir?
      - Uhu, a Mass! Ur llint tughalin!
      - Isul wakud ur ta yezriy! Ur illi kra n uzwar mek istey yan ighimi yatem tigi!
      - Uhu, a Mass! kkes aghwbel… Nekkin lligh ghef tikli.
      - Ikna! iwa, ssfeld-iyi : G ubrid nnek, qad tennaled kra n isekwla imetriren...
      - Mas gan imetriren a Mass?
      - Akwd yitsen igdad iceghnanen...
      - Igdad isawalen?
      - Teqqen-k-inn tukksa n tuggwdi asag tbeddid mnid n isekwla imetriren. Teqqen-k-inn tririt ghef tuttriwin n igdad iwakken a nn-tgulud awettas nnek!
      - Ligh aserhu ameqwran, a Mass, g ttwafernegh ad ddugh ad nnaghegh t-tallunt akwd wakud ghef tirzi n Yemma Tametna!
      - Day, ddu gher dat!

      Amengher, izzel umusnaw ghef tama nnes, issu akal, iqqen allen; walli t-izran ad yighil is ittes mecta aya.
      Iburez Melway acku yettwafren ger ilemziyen akw imatigen n tewsit nnes, maca asmi yeffegh tighremt nnes terwi-yas twengimt, yufrar-d uzaza g tikli nnes acku...

      (...)