Hêmad Hêddaci, memmi s n ifsti d awal, ungal, Merrakwec, tizêrigin Walili, 2002.

Tigariwin ad, iggra d yan wanaw n tskkla g Merrok, llis d iqqan ad nssisfiw ayent izêlin nssisfiw timitar nns. Ad t igan d taskla ittyaran s tmazight. Tlul d taskla yad acku sfaskan mnnaw imaratn, gn tuggas nns af ad ttili taskla yad, taws g usatig n tmagit tamazight g ulzuz n tmatarin g Merrok. Nssn mas tn kkan imazighn ar ttaran awal nnsn sg tasutin zwarnin llig d ikcm lislam, ur ar n zrayn asays n ddin, mkan af tga taskla yat twuri tamaynut g igr amazigh. Mqqar ighama umarg ad igan anaw lli iggutn, ggran d tigariwin a kra n wanawn imaynutn zun d ungal, ad gisn nbdr Askkif n inzâdn n Ali Ikken, Imula n tmektit n Afulay, Ticri n tama n tsarrawt n Bouzaggou, Tawargit d imik n Muhêmmad Akunâd, d Memmi s ifsti d awal n Hêmad Hâddaci llif rad nsawl g tfrt ad.

Nig ammak asrtan izdin d usqsi n tmagit lli tettâf tayafut, zmzêlin tt kra n tmatarin zun d azday nns d taysi n fyils, llitn ikkan ar ass ad tga anaw kullu iggutn ntyafut tasklant tamazight. G mnid ad, adêris n Hêddaci ittâf yan watig mqqurn acku isnawwur g wallas nns kra n tdugamin d tmgniwin n tmktit tadlsant n Imazighn.

Adêris ittuskar g imsawaln ar ittals iswingimn n kra udmawn ittuyassanen n umiyn imazighn, sg Asklu (addag) lli ittmsawaln d Islli (azêru), ar Acal (akal) isaqsan Aghyul, yili sul Agdîd, Asif, Anzâr, Aslm, Tifighra, Insi. Iswingimn n udmawn ad myarn Imazighn g umiyyn d iwaliwn nnsn ddrnin ar addrn afgan d gar ittgga g wakal. Mkan af ittyasay udêris ad g tussna immarghn d wakal, ttmghi gis tfsu g tmktit sul iddrn. Maca ngr akw udmawn ad sugrnin n tmktit ittugzan, mad yiwin ayllig lâh ngr asn Uccn? Mqqar d ur ibag s ixf nns, irwas iz d nttan akw af tsutuln iwaliwn n wiyyâd, acku tihêrci nns tdl isilitn n umiy, d wallas n Mas Hêddaci.

Adêris ad izwar s yan usqsi axatar inna waddag, Asklu s wawal n Hêddaci, llig yagh wafa g waman, mar ad ittc? Irwas is iggd i ifrawn d igariwn nns, mkan af irgm afa d yan t issrghn. S uzday ad immutln ngr afa d waman, d wafa yumêzn g waman as imnad umara yan umadâl n tmatarin llig iswangm azday ngr afgan d ugama, d mamnk as smrdukkunt twuriwin nns anmala n umadâl s kra yuma.

Afulay