Amuddu itters f useqsi yezwaren, yeggeru sis, yegnu taglult nnes f tguriwin nnes sisnin zun d aman. Aseqsi yegweli d mamenk ar ad en tekcemt imi n ugrur lli yakw dûfent wallen , lli zzerigent, ffaghent, kcement zun d imula llis d yettâr ughezan igh tesaqes tafukt, ur temnawayt taghufi n udûf. Ur tent yessuki sellagh îd, îd yeddalen allen yedel ayyenna dûfent. Yeg abrid i yan yeran ad yekcem sellagh yennezi d yan, urt yezzenzi izêri d yan; Ad yekcem zun d tifilla tighasatin n wanu, yagwem ifessi, tufra, d tekrura n îd, d tkenassayt nnad yeffal uzrig n wass. Nek, gh yan mnid, dûffegh ayya g yîd, qqelgh gis ad iyyi yekkes i uzrig n wallen, i tcebarin zdeghnin isaragen n wass. Gh mnid yâden, zdegh gh usyafa ya tajgalt yâden gh igunesiwen inu tteyarasnin, tedra, tmmeghi zun d taceddirt, teg axenzir n tgudî, felli fellas, f ul nesman gh tghezi n ungâz d umyagal n tgwelalin. Righ ad n kcemgh ur zêrigh awed ixef inu, ad n kcemgh tillas n ugrur ur zêrigh awed ixef inu, ad ur syafagh akeccam a, ad ur yeklu s tsughanin nemyar kigan, nessum, nesamum s kigan d tallasin. Ad si yeffu uzemz zun d tifawt n wass, zun d tawargit, zun d ... sellagh ttutgh s timezwayin n unmuggar, nnegh ugemgh turawin n tnebgit lli tessa tezwit g ughbalu n teslatin, yeg gar nnegh afulki igh tesurf amnar teghlaghel tneggift gh tmeswit n usun. Righ ad yeg ifessi n îd akeccam inu, tissi nu, ad ur fferngh timekzâzin nna gigi idêrs usun, yesghel tent ughanim n umater, negh gant urawen n tgudî. Righ ad sghelgh amnar sellagh ad asigh ad regwgh tatswikt n ikettayen inu, ad ur qqazgh ar kigh yad lligh gh ugêdi.

Bedgh tama n lkiran, ar slumgh isewingimen nna yyid yezzan zik a zun d azwu, yegrawl ixef inu ger ikettayen yesusfulen g tezrigin n ussan inu, d tmmelafat n midden yettasin ar serusen ikertân d isekaren, ar tghawalen ad ur kcemn izenzâren n tafukt, ku yan d inna s yemdi tazeliwin nnes urta d ighli wass. Beddgh, gr izrigin a ar sghalgh taghezi wass lli rad kkegh gh Trudant, kigh d akw igwerar n tmuktit inu mmeghinin gh tmara, d uzrig, s trmi, d iseghawsaten, s takat yezgeren idammen, hêyyelgh d ad agwegh, ad ssirdgh kra gh izmulen n wul, yegzin imtlan n ili nu yerufan. Tiklit a menawaygh tazeliwin n midden nna d usin lkiran gh temdinin n yaggugen lligh yega uzemz ussan n tfaska, ur djun righ ad smecacekgh amudu nu d zun d ussan a, tidi n wass tugel i udmawen ghufnin s trula, s tazela, d ifursen n useggwas, negh iseggwasen n uzwag. Iswak n Trudant tkaren s tebratin, s tekrosin yusin isedram n temmara, meqar n akw zdigh tifilla nu ur ad ngêdgh g uccebar n tîtt. Mac stigh ad lkemgh îd inu gh tuzêwayt n zik. Ur ufigh mani yas kkigh tiklit a.

Tazeqremt nna d yedêrn temun d d ifrawen nnes, igh akw tteyagal ur ad lâh adû mas tid isselkamen i wakal, yissini tadûri nnes yemmreten, zun d amettâ, zun d tasaddamt. Mattigh gh usarag i wanusem nna isseghlay uzrig n midden, kcemgh gawergh zun d gar azerg gh teghmirt n yat leqhwa, dûfgh azal d yeqlayen s tazat gh trula n ifessi. Taberbect teman d d tmerziwin nnes s usarag n tmedint ar tssewa tazeliwin gh idmaren n wass. Ar d gigi tssenussuy amarg n igwerar llasnin n Trudant, gr ukettay n tghêri d zik n ilulluyen gh uzrig ur yilin allagh. Mqar d ur ufigh îd, gergh d ghas taberbect, sul ddergh t gh istayen dranin, gh tugmîzin n wawal, d udâr, d usraru n ufugh.