Adêris amezwaru (wis sa gh udlis), isman t F. Corjon.

Tameghra dar Idaw Qays

Ass n tmeghra ar ttawin mdden taslit s tgemmi n usli, igh taggug, ar ttsudu teslit tagwemart negh taserdunt. Issudu dids gwemas, igh dars illa, negh d iwis n àemmis, gh tghwerdin n teslit. Ar ittamêz umeddakwel n usli algamu n tgwemart fad at t igwwed. Ar ittili yan zegh làar n usli gh tesga tafasit ittasin aburiy. Ar tettabàa yat tsuqiyt tagwemart, tasi tagertilt n teslit, tamêz taqzzibt n tagwemart. Ar telsa teslit lizâr umlil d uqeccab umlil, tqqen ccerbil izeggwaghen. Lligh teftu teslit, dêfrent imnayen n ddcer s lbarûd, munent dis temgharin d tehêcmiyin s tghwêrit.

Lligh n lkmen imi n tgemmi n usli, ad asen ukan sseflden is d uckan, àlayen bidden ayt tmeghra n teslit, ar tqqenen ayt tgemmi n usli tifelwin bac a ur kecmen. Acku lqaàida n tmazirt : acku zwaren ikrrâden. Ar temkrrâden ayt teslit d ayt usli, ar d rzêmen tigemmi n usli. Ar yaqlay usli f iggi n fahîna, ar ittasi tasêdlt iàmmeren s tkwefayt, yast s rrêzt nnes. Izerzu tid, ar telkem tesêdlt amnid n teslit. Ar gis tessa teslit yat tugmimt, ar dagh tessa tiss snat. Imil ur a tzzugiz ar kigh telkmen taghwemmirt n uhânu n usli.

Lligh rzêmen tigemmi n usli, ar iqqay umnegf afus n teslit, ar dis ittmun s uhânu n usli. Dêfrenten tmnegfin d tsuqqiyt.

Gh uhânu ar as ittkis umnegf takttuct n lhêbaq illan iggi n ixef n teslit s tazzit nnes, ar tinn ittagwel gh wabya n uhânu.

Lligh ukan ira a yeffugh umnegf, ar as mddint temgharin llid imunen d teslit gh imi n teflut n uhânu, ar t kkatent s idukan, irewl asent. Wanna icatêrn, ar ittfugh bla at t zêrant.

Ar tfessr tsuqiyt tagertilt n teslit gh uhânu. Ima taslit tssufs takwefayt lli illan gh imi nnes daw n tgertilt, tggawer, tfess.

Zegh iggi n fahîna, ar iggar usli tummâzin n tiyni afella n ayt tmeghra, ar tent ggrun ihêcmiyen.

Ayt tmeghra ar ttasin llgha gh ugharas, ar ttinin :

"tigemmi , lajwad as a ittili ugharas ;
igh llan lajwad, ilint tghawsiwin."

Ar ittini dagh :

"Issugga d wudad gh ujarif yan isk
izêra t rrami, yut t, yiwi tin."
"Ljent a teg lmuhîbt n yan mi tnem
imma yan mi twaghd iqqur imi nnes."

Lligh ukan ar ttackan gh imi n tgemmi n usli, ar ttinin ayt teslit :

"Mani kkant isdars n usli ?
is ftant ad zêdant imensi ?"

Ayt usli :

"Iseggwasen ad kkigh, ar nezzâd
an nettkur i babam ar tagmmut."

Ayt teslit :

"Mani ikka Mulay ? ur d uggin.
Id is ur ifrêh i tgemmi nnes ?"

Ayt usli :

"Ifrêh nit i tgemmi nnes,
is awen ittssu tigdîfin ghid,
a ida lasêtwan zuzwanin."

Ayt teslit :

"Tfulki illi, tcâter illi,
lûh at as tisura n uxxam nnes."

Ayt usli :

"Urta nessin ma tega illim,
igh ur turu, taru tmugayt,
ilin ikccûden zegzawnin
ilin imedgiwen gh berra
ibid usêtta gh ughegmmi."

Ayt teslit :

"Hêtta nkweni urta nessin ma yeg iwim,
igh ur inneri leàdu,
irêza uggug, tili taghart.
Ar agh ttinin is ur izêdar i kra !"

Ayt usli :

"A gwema hênna, ur tiwit lalt tezlil,
ur tukwi, yakwi axmmum nnes, akwin igulan. "

Ayt teslit :

"Lûh d legrrum, a mulay
imma buskri ur darun."

Ayt usli :

"Ar agh ttinnint tallubant
ayelligh zêrigh udem nnes
zun d ukan tamasust ittfayen gh ugharas. "

Ayt teslit :

"Bismillah, an nekcem s lemllâh,
an nelûh tudayin yat s yat."

Ayt usli :

"Cekr at i Rebbi lligh d usigh illim
gh ddaw n lemwazb, tagh tt tmmara,
tga tasuka i tighwerâd nnes."

Ayt teslit :

"Ar agh ttinin t ccbab,
ayelligh zêrigh udem nnes,
iga awragh zun d ukan abenkal n ighanimen."

Ayt usli :

"Ar agh ttinin is tga illim tigergezt,
wayni tga gar lluz,
idâren càernin, azzar win tsuqiyin,
mad righ akal nna ur issemghayen ? "

Ayelligh rmin s ikrrâden, ar ttinin ayt teslit :

"Icca yangh usemmîd, tecc agh tafukt,
a tarwa lejwad, rzêm at angh ! "

Ar ttehêwacent temgharin d irgazen gh usarag ar tuzzûmt n yîd. Ihêbu usli, ar d ikcem s treksa s uhânu dar teslit. Ar asen ttawi yat tefqirt snat temkilin, yat teàmmer s tamment, yat s wudi. Tin tamment ar en gis zêrran islan udmawen nnesen yan s yan, izwur usli. Tga tamment zun d ukan lemri, lemri ar ittra tifawt. Ar skaren ghikan fad a ttili tadêfi n lmuhîbt negratsen. Ar cttan udi d tamment s ughrum. Lligh ukan tmman, yut usli taslit iggi n tghwerâd s uduku afasi yan ddûr, tut teslit asli s tcerbilt nnes yan ddûr.

Ad ukan tezri tmeghra, kkin sa wussan, skren targwa n waman, iga làada n tmazirt nnegh. Ar teàmmaren yan uqêsriy s waman gh usarag. Ar is tggan yan wawun gh tuzzûmt, tsers fellas teslit adâr nnes afasi. Tssird as adâr yat temghart n ayt tgemmi n usli s waman n uqêsriy, tefk as uraw n waman. Tsu ten, tkkes teslit adâr nnes zegh iggi n wawun, trewl s uhânu nnes, walayni mdin tt ihêcmiyen d temgharin, ayelligh tra a trewl, ar tt kkaten s tlmêzit ar en tkccem s uhânu. Ayt tgemmi n usli ar attûn tiyni i ihêcmiyen.

Targwa n waman a igguran i tmeghra. Ghikan tekmmel targgwa n waman ar ttbikis teslit, ar ttfugh, zun d timgharin yâdnin, bla nngab fad ad taggwem negh d ad tzzem.