Adêris wis kkûz (wis 49 gh udlis), isman t J.Eugène.

Lqîst n ya wuccen netta d Bumhând

Yan wass crken tayyuga, kraygat yan s tyyuga nnes d mnasêf n wamud. Krzen tayyuga nnesen, ddan s tgwemma nnesen. Kraygat luqt ar tkkan f tyyuga nnesen ayelligh tenwa. Skren mnasêf n ixeddamen gh unrar. Sruten, zuzzren. Inna yas wuccen i Bumhând : "Is tssent ma ra nesker ? A neddu ar tawrirt an, nazzel d gis. Wanna en izwuren s unrar, yawi tumzîn, yawi wanna igguran alim." Inna yas Bumhând : "Waxxa, walayni a neddu s tgwemma nnegh ar asekka lefjr. A nenmaggar gh tawrirt an s tennit."

Idda wuccen, idâlb tiwizi n aytmas, a yawel f a yasi tumzîn. Inna d ixef nnes : "Nekkin a yeran a yezwur Bumhând."

Ibba Bumhând, ismun aytmas, ibdû ten kullu gh ugharas lli gh ran ad azzlen. Kraygat yan igat gh krâd izmuzzâl. Inna yasen : "Igh k ukan yuki, tnnit as : ara ma tentêr !"

Sbâh nmaggaren tawrirt lli. Inna yas : "Bismillah d imikk n tbismillaht." Azzlen ukan. Yakwi uccen Bumhând, ifelt, s n yufa wayyâd gh lgweddam nnes. Yakwi dagh. Ighal wuccen : "Iz d ghir walli ka a yega".

Irûh ukan wuccen anrar, yafen gis Bumhând lli gis insan, ilkem xemstaàc n leàbar. Inna yas wuccen : "Bismillahi rrahêman rrahîm, ljen a yega ghayad ! Flegh tin gh tghwerdîn, izwar iyyi s anrar !" Yasi Bumhând tumzîn, yasi wuccen alim.