Adêris wis krâd (wis 37 gh udlis), isman t J.-M. Franchi.

Igudar n teqbilt

Ar nkkern willi mqqurnin gh teqbilt, ar asen ttinin : " Mun ad a ljmaàt, a nebnu yan ugadir n teqbilt, a gis nsker lbit i yan, a gis nttexzan ayda nnegh, nqabel t gis. Igh illa lbarûd, neàmer t, ar gis nettga tidâf, ar gis nesmun ayda nnegh. Igh illa lhul, ar kullu nettasi ghayda illan gh tgwemma s lebyut illan gh ugadir, kaygat yan s lbit nnes. "

Ar as skaren yan uàessas s twala : kaygat ass ar as attûn lmunt f lebyut, kaygat lbit ar d ttawi kaygat ass lmunt nnes n tiram. Skren as tighrâd nnes igan iqarîden f wayyur. Ar as akkan tasarut n ugadir, n imi n brrâ.

Ar fellas crûden lejmaàt : igh gis ittyakar kra ar t ittexllâs negh asen ibyyen mad t yukren. Linsâf negh d ddàirt negh d azzâyen n teqbilt ar t ittga myya n umetqal d snat teghrsiwin, yat gh imi n ugadir, d yat dar lmuqaddem n teqbilt d yat yâdnin dar bab n lbit lli ittyakaren.

Nkweni lqaàida n igudar ur a gisen ttili tnûtfi, acku nadghur aman. Ar gis ttili yat lbit n ugguram idâfn asen lemsayl n ugadir. Ar dagh takka lejmaàt i lbit n ugguram tarebàiyt n tumzîn negh d tin usengar, negh d tin taqqayin.

Wanna iran ad yasi izîd nnes negh d taqqayin nnes negh d ghayda gis iga gh lbit nnes, ar t ittabàa uàessas lli n imi ar d irzêm lbit nnes. Yasi d ayenna ira, irgel lbit nnes, iffugh.

Aghbar llan gis krâd igudar n teqbilt, yan gis izwaren illa gh Imlil, wiss sin illa gh Wizamaren, wiss krâd illa gh Wanargi. Wad akw gisen imqquren igat win Imlil, ar gis ttilin stin n lbit.