Mohamed Chafik — Muhammad Cafiq — ⵎⵓⵃⴰⵎⵎⴰⴷ ⵛⴰⴼⵉⵇ — محمد شفيق
|
Illul Muhammad Cafiq ass n 17 gh wayyur n Cutanbir gh useggwas n 1926 gh tmazirt n Ayt Sadden, illan gh tseggiwin n Fas. Mad yad ighwêra gh temdint n Azêru, gh tinmel nnes ittussan s Lkulij n Uzêru, idêfr tighêri ayelligh yumêz turagt gh umezruy d udiplum yâden gh tussna n usegmi. Mayad ad as irzêmen igharasen ad yeg yan gh imasayen n tsertit n usegmi gh Merrok. Zegh lligh teffagh Fransa, ikka kigan d twuriwin gh iger n usigmi : zegh lligh ten ikka ar itekka f tghêri izwaren gh kigan n tmedinin n Merrok, ar amezza n umaru n tneghlaft n usselmed gh tezwuri n iseggwasen 1970, ar anedad n Tinmel tageldant. Mekli dagh isseghwera taàrabt, tafransist, amezruy, tussna n usegmi. Iggi n uya, yega Muhammad Cafiq ameslay gh Tkadimit n Tgeldit n Merrok. Tigariwin ad, yega t ugellid d unebdad n Ircam ittuskaren tigariwin gh Rbât.Muhammad Cafiq yega gh imezwura lli ifrken s udem imennawen n tmagit tadelsant n Merrok. Zegh tizwuri n iseggwasen 60 gh tasut ad izrin, ad immagh af d ittuyassan s udem ad izzemzêlin Merrok nger timizar yâden. Kigan d tgharasin as immagh ad is imel i inamuren mas d ur iqqan ad ttun tizrigin llif ttuska tmagit n Merrok, sellawent akw uggug amazigh. Mkan af yara gh tseghunt n Afaq yan mennaw imagraden f wammak idran n umarg n tammaght f tmazirt lli nnan imazighen iseggwasen llid tekcem Fransa. Maca yan ur t yiwi gh uzemz an gh zun d awal ad. Mdden urta d ffughen gh tnaniwin llis izdâ umussu anamur asiwel nnes. Tamazight tega agdal s ur isnem yan. Mkan af dagh iswangem ad yasi imis n Lislam imennawen, lislam ur iqqen f ixef nnes. Asghan ad ismanen imerrukiyen, yighi ad ibedd mnid n usiwel issimghuren s yan udem issiwiden uggug aàrab negh akw azûr aàrab, illulen gh imula n umussu anasiriy gh Miser, d Lbaàt gh Surya d Làiraq. Mqqar d uyan, imerrukiyen sul qqent wallen nnesen f tuggt n uggugen llif ttuska tghesa nnesen.
|
|
Gh yan uzemz lligh isat usiwel n izerfan ufgan ar d ikcem tamazirt, saten mdden ar sawalen f izerf n twisi gh tudert tasertant, gh tudert tadelsant, ssaten imazighen ar sawalen awd nettni s izerf nnesen gh wawal, s izerf nnesen gh igherm. Ghin agh d tugga twuri izgan n Muhammad Cafiq af ad yawes gh tnekra n wawal d idels amazigh. Mad yad yara yan udlis iggezzulen f umezruy imazighen, adlis izdâren ad issimmim i imazighen awal n umezruy isreg asen ad dagh ccen ifrawen gh tasghart n wawal illan gh Dren, issufegh d amawal taàrabt tamazight, d yan udlis ghef tejrrumt tamazight, yawes d yat trabut n imazighen gh usufegh n tseghunt Tifawt ifkan atig igguten i tirra s tmazight.
Ameskan amazigh ad yegan yan gh idêrisen igguran yara Muhammad Cafiq. Ira gis, gh tferka n ayelli mu ttinin asmutti adimukratiy, ad yesmun imazighen af ad inin amnad nnesen gh tizi yad n tudert tsertant n Merok.
Amadalamazigh.com
Ameskan amazigh ad yegan yan gh idêrisen igguran yara Muhammad Cafiq. Ira gis, gh tferka n ayelli mu ttinin asmutti adimukratiy, ad yesmun imazighen af ad inin amnad nnesen gh tizi yad n tudert tsertant n Merok.
Amadalamazigh.com
