Akwfay n immi

I Rebb-amt ay immi
Han yan awent innan
Iwim ittyamâz
Ad ur tallat, tinit as :
Ssnex, ur gin amaker
Akettay ugren
Ma ttsalam
Ur ittu mays nnix gh mezzîy nnes
Iswa gh ukwefay inu
Ma ur itettu warraw
Tettum akw kwenni mad ikwti
Tejlam ukan
Tamazight a t issemghuren
Gh igiwal n mas
Nettat ay zûlen tît nnes
Ass lligh ilul
Nettan a yesawel s umarg
Lligh jdren ul nnes
Isawel tt d ijeddigen
Fsan gh tît n mas
Asin igdâd asallaw
Ur jji ten ttun
Akwfay inu a gis igan irigw
Ur ufin
A yyi ittu ftux
Ur ighwi ma gigi kkusan
Isittin gigi willi iran
Ad ur ilix
Willi iran ad ibbi
Uzûr n tasut nnex
Neghen awal gh imi nu
Melen wayyâd i warraw
Iwi ssnex, ur ittu
May s nnix, ighwi t akw
Tugga nnun max a tengham

Gh imi nnun awal...! Tin imughan (abniq), 14/11/1982
Seg tadla tamaynut: Izmulen, tifert 61, tazrigt 1995.